Пред вецей як децению бешедовали зме з Татяну Салонтаї з Коцура, хтора теди, после законченей штреднєй школи за цукрарку, почала розвивац свой бизнис. Нєшка, после 15 рокох, без єй лакоткох нє мож задумац велї свадзби, родзени днї и други вешеля у Руским Керестуре, Червинки, Вербаше, Кули и Коцуре.
Знаюци же ше школує за цукрарку, Татяни ище як штредньошколки сушеди ношели материял за торти, же би нє мушели глєдац хто им у валалє упече. Праве так, цалком случайно, вошла до, тераз уж розробеного бизнису.
– Так почало. Єдна сушеда чула од другей, та ше швидко розширело же печем торти. Гоч сом ше школовала за цукрарку, можебуц бим ше з тим анї нє почала занїмац кед би ме вони нє „нагнали” – памета Татяна, хтора окрем тортох пече и колачи и слане печиво за свадзби, родзени днї, кресцини и други вешеля. Однєдавна ма ище єдно занїманє – роби и на бензинскей пумпи.
– Зоз лакотками мам найвецей роботи од штвартку по нєдзелю. Кед сезона, за мешац упечем коло 40 торти, а за єдну, хтора наприклад, три поверхи (за млодятох), треба ми коло дзевец годзини. Влєце ю нє можем почац печиц вельо скорей, прето, нє можем шицко постарчиц сама, та ми помага мац. Дзекеди скоро анї нє шпиме, бо по соботу торти муша буц готови – бешедує Татяна, шацуюци свойо руки и поносуюци ше же су єй, як и маляром, вше од фарбох, алє гевтих за торти.
– Велї людзе думаю же то лєгка робота, та кед нє маю цо робиц, надумаю буц тортарки. Алє, я тримам же то нє може кажде. Тортарка муши буц упарта, креативна, муши мац идеї, сцерпеня, алє и дзеку за роботу. Нїхто ше нє опита кельо єй часу треба препровадзиц у роботи и у яких условийох, важне лєм же би на концу упечене и справене було смачне и крашнє випатрало. Муштерия муши буц задовольна – гвари Салонтайова, хтора од початку уживала у тей роботи и ище як мала любела помагац мацери у кухнї. Ридко кеди ми дацо чежко поробиц. Єдино нє барз любим кед мам правиц кульки коло торти, а шицки муша буц єднаки, кажда иншакей фарби – визначує наша собешеднїца.
ФОНДАН ЗАМЕНЄЛ ПУСЛУ И ЦУКРОВО РУЖИЧКИ
„Уметнїцки дїла” нашей собешеднїци найчастейше мож коштовац на свадзбох и родзених дньох, а тераз уж ридко хтора торта нє украшена з фондан-масу и креативнима фиґурками. Як гвари Татяна, муштериї найволя чоколадово и овоцово лакотки, и праве таки торти остатнї роки окреме популарни у Руским Керестуре.
– Вше мам барз вельо муштериї з Керестура, вироятнє прето же сом жила у Кули. И тераз ми, так повесц, шедзиско у Кули, дзе ше радзим з муштериями, бо вони, окрем з Керестура, найчастейше и з Червинки, Вербасу и з Кули. У Коцуре нє мам тельо вельо муштериї, бо там даскельо жени робя тото цо и я. Влєце нє так наручую колачи, а баржей торти, док вжиме наспак. Родичом, углавним, нє жаль дац гоч кельо пенєжи за торту за дзецински родзени днї. Наприклад, єдна торта з фондану кошта од 3 500 динари, та надалєй, а торта на три поверхи за мл
одятох од 15 000 – гвари вона.
Кед починала робиц, трепало ше бильчки на пуслу и з нїма украшовало торти, як и з цукровима ружичками, хтори, гоч нє барз смачни, дзеци сладко єдли.
– Ходзела сом до нини Стриберовей у Коцуре учиц правиц ружички з цукру, хтори скорей були барз популарни. Нєшка модерна фондан-маса, хтора нє барз смачна, алє красна на око, гоч дзеци любя єсц и фондан. Зоз нїм мож фино робиц, бо то таке як правиц дацо з пластелину и нє так ше з нїм чежко спратац, алє заш лєм, треба мац искуства – толкує Татяна хтора, од кеди роби, упекла вецей як тисяч торти.
НАЙЛЄПША РЕКЛАМА КЕД ВАС ПРЕПОРУЧА
Татяна вше провадзи новитети хтори ше зявюю у швеце лакоткох, бо то найлєпши рецепт за обставанє на тим тарґовищу, а тиж так вше прилапює и виволаня у своєй роботи.
– Мушим провадзиц вельо того, од того же на чим будзе торта стац, по вше нови слички за торти, чипочки, хтори мож и єсц, и велї други деталї хтори нєшка єст вшадзи по швеце. Нє барз подзековне, наприклад, кед торта треба же би була у даякей форми, як поведзме медведз, бо вец нє може крашнє стац. Я вше прилапюєм виволаня, гибаль кед думам же то наисце нє годно справиц, або викомбиновац смаки. Алє, дакому барз важни випатрунок, док, єст и тих хторим важнєйши смак, толкує Татяна и додава же єй даєдни муштериї приходза з фотоґрафиями тортох хтори видзели у ТВ емисиї „Краль цукрарох”, а вони, як гвари, гоч випатраю розкошно, нє значи же су таки добри и єсц.
– Даєдни сцу же би торта випатрала так як у даєдней емисиї, алє же би була и полна з овоцу и другим материялом за єдзенє. Вони до н
їх кладу и циви, пластику и друге. Правда же справя гоч цо, алє вельо того нука там нє мож поєсц. Я за вельки фиґури найчастейше хаснуєм стиропор, лєбо стиродур, хтори „облєкам” до фондану, а фиґурки ми помага правиц и єдна жена з Деспотова, хтора роби лєм з тим и зна направиц шицко цо мож пожадац – гвари наша цукрарка.
Муштериї жаданя посилаю и на Вайбер и на Фейсбук, дзе вона вельо промовує свою роботу. Медзитим, гоч зна же то нєшка барз добра промоция, Татяна дума же єст и лєпша.
– Думам же ище вше найлєпша реклама „од устох по уста”. Нови ствари и идеї углавним находзим на интернету. Дацо пробуєм сама, лєбо опатрим на Ютюбу як ше роби, алє заш лєм искуство найважнєйше. Здумуєм дакеди и „зоз глави”, но волїм кед ми муштериї поведза точно цо сцу, бо сом так сиґурнєйша же буду задовольни – гварела Татяна и виволала нам же би єдного дня барз любела мац свою цукрарню.
– Плануєм ю раз отвориц, и тото сом гварела и у интервюу пред 15 роками. Алє, видзи ше ми же нїґда нє позно. Мам два дзивчата, а єдну тота робота интересує, та можебуц єдного дня будземе мац и фамелийни бизнис – гвари Татяна на концу, понагляюци дому, же би сцигла упечиц 15 торти хтори мала наручени лєм за прешлу соботу.
ТАТЯНОВО РЕЦЕПТИ:
Лядова фантазия
15 вайца
800ґ цукру
100ґ муки
марґарин
100ґ чоколади – 100ґ натартей чоколади
20 бананово чоколадки
мармелада.
Єдна жовта пишкота (5 вайца, 5 ложки цукру и 5 ложки муки). Охладзене цесто премасциц на ценко з мармеладу. Увариц жовчки на пари. 10 жовчки, 10 ложки цукру. Кед ше охладзи, вимиксовац з марґарином. До поли положиц розпущену чоколаду. На питку положиц жовти фил, на фалатки порезани бананово чоколадки и вец чоколадови фил. Од горе на дробно натрец чоколаду.
Слани переци
250 ґ сира
250 ґ марґарину
250 ґ муки
пращок за печенє
ложичка солї
вайцо за премасцованє
сусам
Шицко загнєсц и охабиц у фрижидеру.
Розогнац и правиц зоз модлу переци. Премасциц зоз витрепаним вайцом и по нїх посипац сусам.
Печиц на 200 ступнї.