Початком мешаца у Руским Керестуре розґурана дзива депония при теметове на хтору гражданє, прето же нє було контроли вожели вшелїяке шмеце з обисца, Месна заєднїца Руски Керестур апелує же би ше убудуце там одвожело лєм глїну и остатки будовательного материялу.
У општини Кула за комунални роботи задлужени штири комунални подприємства: „Комуналєц” покрива Кулу и Липар, „Руском” Руски Керестур и Крущич, „Роботнїк” Сивец, а „Водовод” Червинку и Нову Червинку. Явному поприємству „Комуналєц” зоз Кули „Руском” рочнє плаци 1,7 милини динари за одвоженє шмеца до Кули, а зоз додатнима трошками за вивоженє шмеца рочнє видвоює коло 2,5 милиони динари.
ЗАБРАНЄНЕ САМОСТОЙНО ОДВОЖИЦ ОРҐАНСКИ ОДПАД
На валалске шмециско, хторе урядово заварте, заж лєм ше одвожи рижни файти одпаду як цо ґуми, найлон, фолию, пиксли и други одпад з обисца хтори нє може стрепац до кантох за шмеце хтори Явне комуналне подприємство „Руском” пражнї штири днї у тижню. Директор того подприємства, Иґор Фейди, наявел же таки одпад гражданє пошвидко буду мушиц самостойно одвожиц до Кули, а на валалске шмециско годно вивесц лєм остатки будовательного материялу и глїну. На жаль, гражданє и далєй здохлїни одруцаю до хотарох, яркох и на дзиви депониї. По закону, здохнути домашнї животинї треба вожиц до кафилериї „Протеинка” у Зомборе, хтора єдина у Сербиї ма беспечни условия знїщованя.
– То наисце вельки проблем у велїх општинох, понеже кафилерия преобтерхована и роботнїки нє можу висц на терен, та ше случує же гражданє длуго чекаю. Закон предвидзує и же општини треба же би обезпечели обєкт за дочасове чуванє здохнутих животиньох, хтори буду прешлїдзени до кафилериї, медзитим, мало хтора општина то реализовала. Ми задлужени за зберанє здохнутих животиньох у шицких местох општини и маме окремни змаржляки у хторих их чуваме покля ше их нє прешлїдзи до Зомбора – толкує директор ЯКП „Комуналєц” Дамян Милянич.
Гоч за Руски Керестур задлужена Кула, здохнути животинї у поради зоз гражданами збера роботнїк ЯКП „Руском”, цо швидши способ як контактовац з „Комуналцом”.
ПРОЄКТ РЕҐИОНАЛНЕЙ ДЕПОНИЇ
Ище 2005. року на уровню Заходнобачкого округу подписани протокол, а познєйше и рижни контракти о вибудови Реґионалней депониї у Зомборе.
– Прето предвидзене и заверанє шмецискох у местох општини Кула, та одвоженє шмеца на депонию до Кули, хтора би мала статус транзитней депониї. Шмеце би ше привожело, преберало, одпад хтори годно би ше рецикловало, а остатки би ше балировало и одвожело на тоту главну депонию до Зомбора. Кулска општина за одвоженє комуналного одпаду урядово заварла депониї у Руским Керестуре, Липару, Крущичу и Новей Червинки, та ше одпад одвожи на депонию у Кули. Затераз поробени лєм проєкт трансферней станїци, а нє реализовани є прето же тота фаза шлїдзи после вибудови реґионалней депониї, медзитим то ище вше стої. Затераз закончени основни инфраструктурни роботи, алє є далєко од закончуюцей фази – гвари Милянич.
Директор ЯКП „Комуналєц” Дамян Милянич
УВОДЗЕНЄ ЕВРОПСКИХ СТАНДАРДОХ
У Сербиї треба запровадзиц отримуюцу систему защити животного штредку, хтора обезпечи лєпше здравє, квалитет живота, та лєпши условия за привредзованє, а же би ше то до витворело треба же би ше уключели и гражданє и їх представителє. Управянє з одпадом будзе вельке виволанє векшини општином у Сербиї, та и за кулскей. Наша держава ище далєко од европских стандардох, алє мож повесц же ше заш лєм нє стої у месце. Пред даскельома роками у Керестуре поставени контейнери за пет-амбалажу, а планує ше положиц и контейнери за скло, папер и пластику, наявел Фейди. У Кули ше влонї почало зберац склєняну амбалажу од правних особох, насампредз у погосцительних обєктох, алє то ище вше у пробней фази.
– Циль нам тиж розвиц свидомосц о сепарациї амбалажи, зменшац шмеце хторе закончи на кулскей депониї и можем поверсц, затераз, одволанє добре. У наиходзацим периодзе би ше могло злєпшац одволанє гражданох же би окончели примарну сепарацию, насампредз пет-амбалажи. Нашо подприємство уж 10 роки окончує сепарацию, зберанє тей амбалажи и преробок. Окрем финансийного ефекту, значне же вельки количества тей амбалажи нє закончую на депониї – гвари Милянич.
Способносц Сербиї у запровадзованю законох з обласци животного штредку єден з ключни критериюм у оцени кельо вона порихтана за доставанє статуса кандидата, та членство у Европскей униї. Наша держава тераз закончує акцийни плани хтори потребни за отверанє поглавя 27, хторе ше одноши на животни штредок. Обчекує ше же тото поглавє будзе пошвидко отворене, а завре ше аж при концу прегваркох зоз ЕУ. У процесу пребераньох стандардох ЕУ найвекши трошок будзе у обласци водох, потим у секторох одпаду и индустрийного заґадзеня.