Уручени контракти 168 ґаздовством

автор сен
1.1k Опатрене

НОВИ САД – По конкурсу Покраїнского секретарияту за польопривреду, водопривреду и лєсарство 168 польопривредним ґаздовством розподзелєни субвенциї вредносци 145 милиони динари – за наводньованє, продукцию у пластенїкох, процивкаменцово мрежи, набавку опреми за фарми статку и за преробок овоци и желєняви.

Контракти польопривреднїком уручел ресорни секретар Бранислав Боґарошки, котри гварел же интересованє за доставанє средствох того року векше, а понеже за тоти намени ище єст пенєжи, поволал польопривреднїкох котри жадаю укладац до своєй продукциї най ше приявя.

– Тераз зме найвецей контракти, аж 101, додзелєли за системи за наводньованє, цо нови 1 300 гектари под такима системами. Опредзелєли зме 26 контракти за нови 30 000 квадратни метери поверхносци под пластенїками, а 18 контракти за нови 74 гектари за закриванє з процивкаменцовима мрежами. За набавку опреми за фарми статку зме додзелєли 21 контракт, а два за преробок овоци и желєняви – гварел Боґарошки.

ПОВЯЗАНИ ТЕКСТИ