БЕОҐРАД – Представителє синдикатох просвитних роботнїкох и Министерство просвити вчера усоглашели текст колективного контракту, на чим просвитни роботнїки найбаржей инсистовали. Медзитим, штрайк ище вше нє закончени, та наставни годзини скрацени на 30 минути.
Тераз шлїдзи подписованє окремного спорозуменя, виявел представитель Униї синдикатох просвитних роботнїкох Сербиї Звонимир Йович за аґенцию Бета и додал же ше просвитни роботнїки виборели за условия хтори подобни условийом занятих у здравстве.
Усоглашени текст окремного колективного контракту подрозумює же у просвити перше будзе розподзелєни кадер котри нє ма полни фонд годзинох, а остатнє ришенє може буц розписованє конкурсох.
Ґу тому, окрем ювилейних наградох хтори ше додзелює за 10, 20 и 30 роки роботи, планує ше увесц и награду за 35 роки роботного стажу у просвити, як и новорочни и видовдански награди.