КОЦУР – Всоботу, 2. априла, на пияцу у Коцуре отримане „Ярнє розпредаванє половних стварох” и идею Емилиї Чизмаровей прилапели числени Коцурци, та хасновани ствари були розпрестарти скоро по шицких тезґох, а було и надосц заинтересованих купцох.
На тезґох могло пренайсц шицкого – од алату, кухньового прибору, бавискох, прикраскох и кнїжкох по обуй и облєчиво, чого було и найвецей. Ствари предавани по символичних ценох, а по законченю, нєпопредане облєчиво и бависка однєшени до Каритасу, дзе буду розпоредзени тим котрим су потребни.
На єдней з тезґох предаване половне облєчиво хторе назберали вецей дзивчата у акциї „Пайташки за пайташку”, а заробени пенєж наменєни за лїченє єдней анонимней особи.