ВЕРБАС – У центре за физичну културу „Драґо Йовович” у Вербаше вчера отримани Саям образованя и професийней ориєнтациї з мотом „Упознай швет занїманьох и вибер праве за себе”. Саям орґанизовала Канцелария за младих Општини Вербас, у сотруднїцтве з вербаским Оддзелєньом Националней служби за обезпечованє роботи.
Саям бул наменєни школяром основних и штреднїх школох з вербаскей општини и околїска, пре помоц у одлучованю за предлужованє школованя. Школяре могли порозпатрац штанди 15 факултетох и 10 штреднїх школох, побешедовац з представителями тих установох и достац промотивни материял.