НОВИ САД – Рубрика „Тижньовнїк” у тогорочним дзешатим чишлє новинох „Руске слово” аналитично випитує причини вше частейших окраданьох просторийох руских дружтвох, а увага и на теми прецо ше ище вше нє хаснує каплїчку у Коцуре.
„Нашо места” и того тижня информую о схадзки Совиту керестурскей Месней заєднїци и о нових крочайох у ришованю проблему з воду за пице у тим месце, а ту и звити з вистави ручних роботох з нагоди 8. марца у Коцуре и перформансу Здруженя женох „Олория” у Дюрдьове.
Бок „Економия” у новим чишлє зазначує яки бриґи ма локална власц у Шидзе у ґаздованю з лєсами, а читачох упознава и з хованьом виєтнамских прашатох.
Попри информацийох о тим як по наших местох означени Дзень женох, „Култура и просвита” понука и длугши напис о тим швету, о правох женох дакеди и нєшка. Ту и розгварка з Янком Лендєром з Вербасу, котри того року означує два ювилеї.
„Духовни живот” пише як означени Шветови молитвови дзень и реґионалне стретнуце каритасох у Мостару, док рубрика „Людзе, роки, живот” упознава читачох з коцурским ковальом Юлияном Лазором, а прейґ искуства трох Руснакох пише и о роботох на прейґокеанских крузерох.
„Мозаїк” представя младежску емисию на Радио Новим Садзе „Рутин” и двоїх младих лидерох на конференциї у Новим Садзе. Медзи иншим, на „Спорту” зазначени успихи керестурских каратистох и одкриванє бисти Йоакимови Виславскому Киметови, а як додаток у тим чишлє вишла „Дикица”.