ДЮРДЬОВ – Зоз снованьом Штабу за позарядово ситуациї, одредзованьом приоритетних местох за чисценє шнїгу и анґажованьом фирми з машинами, Општина Жабель порихтана за перши шнїг.
У Штабу за позарядово ситуациї заняти у Општинскей управи и општинских явних подприємствох и институцийох, а за чисценє шнїгу на драгох од 15. новембра того, по 31. марец идуцого року задлужене д.о.о. „Копово” зоз Жаблю, хторе порихтало пейц машини за роботу у штирох местох општини.
Порихтани и 20 тони индустийней солї и 20 тони ризли за интервенциї на явней драги Л-7 – од семафору у Жаблю по мост на Тиси. Главну драгу ґу Темерину, Шайкашу и Бачкому Ґрадишту и надалєй будзе отримовац ЯП „Драги Сербиї”.
Анґажовани виводзач роботох будзе дежурни 24 годзини, а без налогу шнїг може чисциц кед напада коло 10 центиметри. Кед будзе потребне, за одруцованє шнїгу на явних поверхносцох буду анґажовани и особи з евиденциї Центру за социялну роботу.