РУСКИ КЕРЕСТУР – Керестурску парохию вчера нащивели вирни зоз грекокатолїцкей парохиї у Сегединє, у Мадярскей, з хтору Керестурцом врацели прешлотижньову нащиву їх парохиї и Марийовому святилїщу у Марияповчу. Грекокатолїки зоз Сечедину припутовали на єдним автобусу.
Нащиви резултат проєкту прейґранїчного сотруднїцтва у цивилном секторе, за хтори з Ембериєри гораш – фондациї ЕУ за Мадярску, средства достала сеґединска грекокатолїцка парохия св. Розалиї. То источашнє и перши конкретни прейґранїчни проєкт з ЕУ у нашей рускей заєднїци.
Вирни рижних ґенерацийох зоз Сеґедину вчера у керестурскей Катедрали були на Велькей Служби Божей на 10 годзин. Службу предводзели домашнї парох о. Михайло Малацко и капелан о. Владимир Медєши, а сослужели сеґедински священїки о. Миклош Саплонцаи и о. Андраш Горняк, як и єден римокатолїцки священїк зоз суботицкого владичества.
Часц Служби шпивал и домашнї Хор, под руководительством Лидиї Пашо, котри на концу Служби госцом, вєдно з парохиянами, одшпивал Многолїтствиє.
По Служби домашнї госцох почасцели у просторийох Каритасу, а потим нащивели и Провинцийни дом и манастир шестрох служебнїцох.
