РУСКИ КЕРЕСТУР – Вчера почало прекопованє и преглїбйованє яркох на найкритичнєйших местох у валалє, дзе после вельких дижджох вода стої и представя проблем гражданом Керестура. Копанє почало у Русинскей улїци, на поцагу од улїци Ю.Н.А. по Ґабра Ороса.
Будзе ше копац и на улїци Сивч Йовґена, потим на Новим населєнє (Блок 3) и беґельчик у улїци хтора их злучує. Надалєй, ярки буду викопани и у улїцох Ирини Провчи, Янка Тота Боґмека, на крижней драги Русинскей и Ленїновей, та на Иви Лоли Рибара – од крижаня з улїцу Петра Кузмяка по Йовґена Семана.
Роботи окончує подприємство „Extra auto Transport“ з Вербасу, а финансую их Месна заєднїца зоз 336 000 динари зоз самодоприносу и Општина Кула зоз 144 000 динари.
Директор Явного комуналного подприємства „Руском” Иґор Фейди гварел же ше глїну з яркох такой одвожи и плановане википовац 10 приколици на дзень, цо значи же би роботи могли буц закончени за 10 днї.