КОЦУР – Коцурска Основна школа „Братство єдинство” нєшка означує Дзень школи, хтори школяре и просвитни роботнїки означа з численима активносцами.
Од 8,30 до 9 годзин на кошаркашским терену у школским дворе будзе орґанизована вистава домашнїх любимцох, а од 9 до 10 годзин у физкултурней сали буду штафетни бависка.
У учальньох од 10 до 11 годзин будзе орґанизоване змаганє „Най фризура” и роботня „Леґо коцки” за младших, а за старших школярох тиж змаганє „Най фризура”, од 9 до 10 годзин.
У лєтнєй учальнї од 9 до 12 годзин будзе орґанизована подобова колония, як и подобова вистава у учальнї 2.
Попри спомнутого, од 9 до 10 годзин будзе орґанизована роботня за правенє икебанох (у учальнї 6), як и турнир у фодбалє на школским терену. Од 10 до 11 годзин у учальнї будзе язични квиз, як и турнир у мини-одбойки за дзивчата у физкултурней сали, а од 11 до 12 годзин будзе караоке-змаганє у учальнї 4.
Змаганя и плановани активносци отворени за шицких заинтересованих.