КОЦУР – Вчера вечар у нових просторийох Коцурского здруженя младих (КУМ) отримана промоция младежскей радио емисиї „Останьце нашмеяни”, з нагоди 10-рочнїци єй емитовня, а з тей нагоди виведзена и културно-музична програма. Пред програму, за шкоярох висших класох основней школи отримана роботня о сайбер-насилстве.
Роботню зоз школярами отримала волонтерка нєвладовей орґанизациї „Балкан идея” Соня Гудак з Нового Саду, а присуствовали седмеро школяре, котри могли научиц як ше на интернету можу защициц од сайбер-насилства и яка осторожносц потребна при обявйованю власних податкох на дружтвених мрежох.
Гудакова була госц и на промоциї емисиї „Останьце нашмеяни”, хтору младим отримали єй водительки Саня Полдруги и Саня Маркович. Синиша Мали з Коцура з тей нагоди бешедовал о свойому проєкту за очуванє животного штредку, а предсидатель КУМ-у Стеван Самочета о нових просторийох и планох Здруженя за наступни период.
Як госц на промоциї бул и Михаил Рамач з Дюрдьова, котри читал свою поезию, одшпивал и два авторски композициї, а под час їх шпиваня, на ґитари провадзел Саню Полдруги и Таниту Ходак. Зоз свою поезию на сербским язику представел ше и Коцурец Иґор Пушкаш.
