У Коцуре отримане Медзиокружне змаганє зоз руского язика

автор злк
604 Опатрене

КОЦУР – Основна школа (ОШ) „Братство єдинство” у Коцуре всоботу, 6. априла, була домашня 10. Медзиокружному змаганю з руского язика и язичней култури за школярох од пиятей по осму класу.

На змаганю участвовали 48-еро школяре зоз 11 наших местох, зоз порядней настави змагали ше 30-еро зоз трох наших школох – зоз Коцура, Руского Керестура и Дюрдьова. Зоз школох дзе ше руски язик учи як виборни предмет участвовали 18-еро школяре зоз осем наших местох – Нового Саду, Ґосподїнцох, Сримскей Каменїци, Вербасу, Кули, Савиного Села, Бачкей Тополї и Шиду.

Змагательох и госцох привитала Ирина Папуґа зоз Дружтва за руски язик, литературу и културу, директорка ОШ „Братство єдинство” Славица Байор,  Даница Парошки зоз Општини Вербас, як и Мелания Римар, предсидателька Одбору за образованє Националного совиту Руснацох. Тести за Змаганє порихтали проф. Мелания Сабадош и Мария Стрибер зоз потримовку др Юлияна Рамача.

Перши три места и награди (кнїжки) освоєле 35-ецеро школяре од 5-8 класу: 18-еро зоз порядней и 17-еро зоз виборней настави, a шицки присутни достали и подзекованя.

На Републичне змаганє, хторе ше отрима 25. мая 2019. року тиж и Коцуре пласовали ше 18 школяре зоз 7 и 8 класох (9 зоз порядней и 9 зоз виборней настави).

ПОВЯЗАНИ ТЕКСТИ