КОЦУР – Предсидатель Општини Вербас др Братислав Кажич вчера, 18. октобра, положел першу лопату за фундаменти будуцей ґаражи за огньогасни камион Добродзечного огньогасного дружтва (ДОД) у Коцуре, з чим урядово почало єй будованє.
Огньогасни камион за хтори ше прави ґаражу купени 2013. року з пенєжу цо назберали Коцурци, а купованє финансийно помогли Општина Вербас и Покраїна Войводина. През жиму, тот найсучаснєйши камион ДОД у Войводини бул змесцени у Вербаше.
Ґаражу буду правиц сами огньогасци, а обчекує ше же до конца рока камион уж будзе змесцени у тей новей ґаражи ДОД, на пияцу.
ДОД Коцура того року означує 85-рочнїцу роботи, алє централна преслава нє будзе отримана, бо пенєж за єй орґанизованє унапиямени на вибудов ґаражи.
Проєкт за нову ґаражу виробела „Дирекция за вибудов Вербас”, а професийни огньогасец Зоран Докнич, котри спомнути камион пригнал зоз Словениї, коцурскому ДОД подаровал 16 кубики шлюнку. Вибудов зоз свою роботу спонзорує и Милан Рашета, як и сами огньогасци, котри ше одрекли дньовнїцох под час дежурства у жатви.
Ґу тому, як визначел совитнїк предсидателя ДОД Янош Надьфеї, шицки средства Дружтва у тим року унаприямени на вибудов ґаражи, а тих дньох обчекую же сцигнє и материял и финансиї за його дальше купованє, хтори, як обецане, обезпеча Општина Вербас и Месна заєднїца Коцур.
