КОЦУР – Швето Рождество Христово по юлиянским календаре у обидвох коцурских церквох Успения пресвятей Богородици, шветочно преславене 6. и 7. януара.
У рускей церкви Всеночне на Вилїю, 6. януара, служене на 23 годзин, а вчера були крачунски Служби Божо на котрих були шпивани красни коляди.
Вчера и на Вилїю пред Всеночним по коцурских обисцох дзеци и млади ходзели по шпиваню и винчованю, було и даскельо вертепи, а коляди шпивали и гудаци и тамбураше.
Нєшка у службох паноцове буду мировац вирних, а у Доме култури на 19,30 годзин будзе отримани и традицийни Крачунски концерт.
Попри грекокатолїкох, Крачун у Коцуре преславюю и православни вирни, та у дворе православней церкви на Вилїю, на 20 годзин у присустве числених вирних и того року традицийно запалєни бадняк, цо було провадзене зоз огньометом.
Пред Крачуном вирни модлєли Дзевятинїцу котра того року дополнєна зоз текстом Роздумованє о Крачунє, а котри читала шестра Владимира кажди дзень як файту медитациї.