У кулскей општини 45 вецей занятих, зменшанє числа и у Керестуре

автор зам
874 Опатрене

КУЛА – У наступних трох рокох кулска општина за 45 особи муши зменшац число занятих у општинских орґанох, явних подприємствох и установох хторим є снователь – з терашнїх 481 на 463 – гварене на вчерайшей схадзки Скупштини општини Кула, на хторей прилапена Одлука о максималним чишлє занятих на нєодредзени час у системи локалней самоуправи. Одлука принєшена на основи найновшого Закона о максималним чишлє занятих у явним секторе.

Уж по початок фебруара 2016. року число занятих будзе зменшане за 29 особи, найвецей у орґанох општинскей управи и явно-комуналних подприємствох, та у обласци култури и дзепоєдних месних заєднїцох, а вец шлїдзи зменшанє за ище 14 особи.

Як на СО Кула гварел заменїк предсидателя Општини Велибор Милоїчич, у першим кругу рационалнизованя пойду заняти котри блїзко при пензионованю, буду преглашени за технолоґийни звишки и достаню одпремнїни по тей основи.

Вязано за Руски Керестур, у ЯКП „Руском” можу буц заняти найвецей 16 особи, а тераз єст 18, так же число будзе зменшане за 2 особи.

Зменшанє числа будзе и у Доме култури, дзе можу буц 5 заняти, так же як звишок будзе преглашена єдна особа (административни роботнїк), док у Месней заєднїци Руски Керестур нє будзе зменшованя числа занятих, понеже робя  2 особи, кельо и предвидзене.

СО Кула з векшину гласох прилапела спомнуту одлуку, а представителє опозициї спозорели же би ше водзело рахунку о чишлє занятих у култури, понеже, як гварели, кед фахово роботнїки пойду до пензиї, їх роботни места ше гаши, та постої опасносц од гашеня роботи установох у култури.

ПОВЯЗАНИ ТЕКСТИ