НОВИ САД – У тогорочним двацец дзевятим чишлє новинох „Руске слово” рубрика „Тижньовнїк” пише о менованю Школского одбору у керестурскей Школи, о ефектох приватизациї локалних медийох у Вербаше и Шидзе, а представя и резултати и водзаци напрямки проєкту „Развионица”, як моделу за наявену реформу образовней системи.
Боки „Нашо места” зазначели схадзки скупштинох општинох Вербас и Кула, на хторих принєшени вецей одлуки, медзи нїма и одлуки хтори ше одноша на ЯКП „Руском”, а ту и текст о єднорочним искустве явного превожнїка „Путоказ”, хтори роби у општини Кула. На тих бокох наявена и Акция „Дай и ту свою руку” у Коцуре.
„Економия”, медзи иншим, пише о предаваню ґереґох у Дюрдьове, як и о вибудови хладзальнї у Бачинцох.
„Култура и просвита” на своїх бокох приноши звити з госцованя Бикичаньох у Польскей и змаганя подобових уметнїкох у кулскей општини, представя найновшу кнїжку „Осце и черешнї” Агнети Бучко Папгаргаї, а ту и розварка з тогорочну побиднїцу за найкрасши дзивоцки глас на Фестивалу „Червена ружа” Йовану Ноґавицу.
„Людзе, роки, живот” представяю читачом Владимира Дудаша, маляра-аматера з Руского Керестура и Невенку Бобаль з Бикичу, длугорочну активистку у култури.
„Духовни живот”, медзи иншим, пише о Еколоґийним сходзе у Водици, о преслави швета пророка Илиї, а „Мозаїк” о Иванови Кишови з Дюрдьова, студентови на Академиї уметносцох у Новим Садзе.
На бокох „Спорту” мож пречитац и о средствох хтори хтори Општини Кула опредзелєла за порядну дїялносц Спортского дружтва „Русин”, як и о розхладзованю жительох Вербасу и околїска на базенох.
Як додаток у тим чишлє вишол „Дом и фамелия”, дзе анализа телевизийних програмох за дзеци, а вишла и нова „Женоблоґия”.