НОВИ САД – У тогорочним трицец oсмим чишлє новинох „Руске слово” рубрика „Тижньовнїк” пише о сходзе Координациї националних совитох у Ковачици, як и о билинґвалносци и важносци ученя и знаня вецей язикох, з нагоди означованя Европского дня язикох.
Рубрика „Нашо места” пише о новим просторе и реконструкциї Рибного пияцу у Новим Садзе, о зашеданю Шветовей ради Руснацох/Русинох/Лемкох у новим зволаню, хторе було у Старих Янковцох, та о новим успиху младих новоораховских огньогасцох.
На бокох „Економиї” мож пречитац як чече ламачка у наших хотарох, яку ше цену понука за кукурицу, як и о хлороґену цо будзе поставени у Керестуре.
На бокох „Култури и просвити” интервюу з Олґу Карлаварис, длугорочну редакторку култури у Рускей редакциї РТВ, а ту и текст о означованю 70. рокох народзеня Серафини Макаї .
Рубрика „Людзе, роки, живот” зазначела перши пензионерски днї Славка Сабола и о його длугорочней роботи у Заводзе за учебнїки у Новим Садзе, док у „Мозаїку” интересантни текст о тим цо видумал Александар Бесерминї же би студенти лєгчейше дошли на шалтер, а представена и асистентка на ПМФ Тамара Хрин.
Рубрика „Духовни живот” пише як преславени Кирбай у Дюрдьове, а „Спорт” о резултатох наших екипох у локалних фодбалских лиґох и Турнире ветеранох у малим фодбалє у Новим Орахове, у рамикох Спортских бавискох „Яша Баков”.
У тим чишлє вишли и два додатки – „Литературне слово” и „Дикица”.