У новим „Руским слове”

автор ядю
921 Опатрене

НОВИ САД – У дзевятим тогорочним чишлє новинох „Руске слово” рубрика „Тижньовнїк” свойо боки пошвецела активносцом Националного совиту Руснацох, односно схадзки на хторей прилапени ребаланс тогорочного буджету, нащиви його делеґациї Прешовскому самоуправном краю у Словацкей, як и схадзки Одбору за образованє.

Окремна увага на бокох „Наших местох” пошвецена борби з лїшками у Руским Керестуре, а ту зазначени и вецей подїї у наших местох, як и гуманитарни акциї.

Теми рубрики „Економия” докапитализация „Руского двору”, о чим бешедоване на Скупштини акционерох у Руским Керестуре, як и Медзинародне стретнуце Економиї заєднїцтва у Крижевцох.

О рочних скупштинох Руского културного центру у Новим Садзе и КПД „Дюра Киш” у Шидзе, як и о промоциї роману „Ирина” Санї Тиркайло у Шидзе пише на бокох „Култури и просвити”, а у тей рубрики наявени и наиходзаци Фестивал новей рускей шпиванки „Ружова заградка”. „Мозаїк” у тим чишлє представя студента на докторских студийох Сашу Сабадоша.

Рубрика „Людзе, роки, живот” почина серию написох з назву „З другого боку творчосци”, у хторей будзе представяц наших писательох. У тим чишлє написана приповедка о живоце академика Юлияна Тамаша, а попри тим, на тих бокох читачом представена и новинарка и активистка Мария Перкович.

„Духовни живот” зазначел першу духовну обнову за панїматки у Руским Керестуре, як и означованє 95. родзеного дня монахинї Кристини у манастире Исусових малих шестрох.

Попри звитох з приятельских пририхтуюцих змаганьох фодбалских клубох з наших местох „Спорт” пише и о промоциї кнїжки „Нови контранапад” познатого спортского фаховца и новинара Мирослава Виславския.

ПОВЯЗАНИ ТЕКСТИ