НОВИ САД – У петнастим тогорочним чишлє новинох „Руске слово” рубрика „Тижньовнїк” предлужує представянє виберанкових лїстинох на републичним, покраїнским и локалним уровню, а ту зазначени и активносци Националного совиту Руснацох, як и нащива заменїци Покраїнского омбудсмана Еви Вукашинович Дюрдьову.
У рубрики „Нашо места” пише о бриґох зоз псами блукачами у шидскей општини и оправяню драгох до хотара, та о поставяню пречисцовача води у Дюрдьове. Ту и комунални теми з Керестура и вистка о гуманитарней помоци Коцурцом з Голандиї.
„Економия” розпатра чи ше виплаци занїмац зоз заградкарску продукцию, алє и як ше у приватним поднїмательстве знашол Вербащань Славко Папуґа.
„Култура и просвита” пише о пририхтованю коцурских матурантох за закончуюци испит, ту звити з премиєри дзецинскей представи у Дюрдьове и „Бамби фесту” у Керестуре, як и наява тогорочного Драмского мемориялу Петра Ризнича Дядї.
У сериї написох „З другого боку творчосци” рубрика „Людзе, роки, живот” у тим чишлє пише о писательки Ирини Гарди Ковачевич, а пред Мемориялом представя и нашу длугорочну ґлумицу Ану Рацову з Руского Керестура.
„Духовни живот” анализує способ одредзованя датумох славеня Велькей ноци, а „Спорт” понука и розгварку зоз спортским новинаром и роботнїком Мирославом Виславскийом.