КОЦУР – Всоботу, 28. новембра, у ОШ „Братство єдинство” у Коцуре у рамикох Спортских бавискох „Яша Баков” отримани турнири у пикаду, як и у шаху за дзеци до 15 роки, а у орґанизациї КПД „ДОК”. На турнире у пикаду участвовали 10, а у шаху три екипи.
У пикаду ше змагали СД „Русин” з Руского Керестура, „Папивинґ” з Вербасу, РКЦ з Нового Саду, КУД „Тарас Шевченко” з Дюрдьова, 2 екипи з Петровцох, з Горватскей, а з Коцура ше змагали екипи КПД „ДОК”, „Огньогасни шарканї”, Союз инвалидох роботи и Актив женох Куд „Жатва”. Змаганя бавени поєдинєчно и екипно.
У хлопскей конкуренциї екипно перше место завжала екипа „Огньогасни шарканї” з Коцура, друге екипа Петровци 1, а треце СД „Русин” з Руского Керестура. У екипней женскей конкуренциї перше место освоєла екипа КПД „ДОК” з Коцура, друге КУД „Тарас Шевченко” з Дюрдьова, а треце „Папивинґ” з Вербасу. У миксу, найлепша була екипа КУД „Тарас Шевченко” з Дюрдьова, друге место освоєла екипа КПД „ДОК” з Коцура, а треце „Папивинґ” з Вербасу.
У поєдинєчних змаганьох у пикаду у хлопскей конкуренциї перше место освоєл Златко Колєсар з Коцура, друге Златко Медєши з Петровцох, треце Милан Дукич з Коцура, а у женскей конкуренциї перша була Марияна Миклош з Дюрдьова, друга Мария Драґович и треца Серафина Дудаш, обидва з Коцура.
На турнире у шаху перше место екипно освоєли школяре ОШ „Светозар Милетич” з Вербасу, друге „ОШ Петефи бриґада” з Кули, а треце домашнєй ОШ „Братство єдинство”. У каждей екипи були по штверо змагателє.
Поєдинєчно, перше место у шаху освоєла Матилда Навратил з Вербасу, а друге и треце место подзелєли Марко и Йован Купусович з Вербасу.
