РУСКИ КЕРЕСТУР – Явно-комуналне подприємство (ЯКП) „Руском” тих дньох на жридлу водоводу докончує осучасньованє на першей студнї и кладзенє закрица на управним будинку водоводу.
На першей зоз штирох студньох ткв. студньово колони у шахту дзвигнути на висши уровень од поджемних водох, же би нє пришло до їх вилїваня до системи за подмирйованє з воду, як анї мишанє з атмосферскима водами. Ґу тому, циви за воду преправени на сучаснєйше скапчованє – потолковал за Рутенпрес инж. Йоаким Надь.
На управним будинку водоводу ше кладзе нове закрице, понеже будинок мал лєм ровну бетонску плочу, прецо уж вецей роки премакало, дознава Рутенпрес од директора „Рускому” Иґора Фейдия.
По його словох, роботи на студнї коштали 430 000, а на закрицу 480 000 динари, цо „Руском” финансує зоз своїх средствох, а роботи окончели подприємства „Пан-аква инженєринґ” зоз Сириґу и „Мандич” з Кули.