НОВИ САД – Утвердзованє одвичательносци директора Явного комуналного подприємства (ЯКП) „Информатика“ и снованє роботней ґрупи хтора би мала утвердзиц яки стан у тим подприємстве, та предкладанє же би ше з длужносци директора „Информатики“ розришело Деяна Челара, були предложени точки дньового шору на вчерайшей схадзки Скупштини Городу Нови Сад.
Медзитим, схадзка закончена о даскельо минути, понеже векшина одборнїкох нє прилапела дньови шор, преноши Танюґ. За предложени дньови шор гласали 17 одборнїки, процив були 44, а 12 одборнїки нє гласали.
Схадзку иницировали одборнїцки ґрупи Демократскей странки (ДС), Лиґи социялдемократох Войводини (ЛСВ) и Сербскей радикалней странки (СРС). Вони ше оглашели прейґ сообщеня, у хторим ше поволали на податки Державней ревизорскей институциї хтора 2013. року анализовала роботу „Информатики“ и утвердзела же у нєй єст нєправлилносци.
На чолє „Информатики“ Деян Челар, з политичней орґанизациї Треца Сербия, хтора на городским уровню у коалициї зоз Сербску напредну странку (СНС). Новосадска опозиция обвинює Трецу Сербию же людзом зоз своєй странки дава роботу у тим ЯКП, троши вельо пенєжи на репрезентацию и подобне.