СЛОВАЦКА – Влада Словацкей Републики 26. октобра принєсла Акцийни план за защиту особох котри припадаю националним меншином и етнїчним ґрупом, од 2016. по 2020. рок, преноши портал лем.фм информацию зоз службеного сайту Влади Словацкей. Документ принєшени пре обезпечованє ефективней, преглядней и витворлївей охрани и потримовки правох националних меншинох и етнїчних ґрупох, насампредз у рамикох институцийней системи.
Акцийни план виробел Уряд ополномоценїка за национални меншини и етнїчни ґрупи Влади Словацкей, а як гварел ополномоценїк Ласло Буковски, то перши документ з хторим детально и з конкретнима крочаями дати простор за имплементованє политики Влади спрам националних меншинох.
У Акцийним планє одредзени цилї за творенє правних актох вязаних за права и позициї националних меншинох и етнїчних ґрупох, План злєпша систему потримовки култури меншинох, будзе ефикаснєйше мац у оглядзе специфичносци воспитно-образовних потребох, злєпша условия службеного хаснованя язика и писма у пракси, як и инфомованє на язикох меншинох, алє и о националних меншинох и етнїчних ґрупох у Словацкей.