СРИМСКА МИТРОВИЦА – У Музею Сриму у Сримскей Митровици нєшка будзе отворена вистава „Ружа на хусточки”, як закончуюца часц проєкту и креативних роботньох з обласци применєней етнолоґиї Музею Сриму и Дружтва Руснацох у Сримскей Митровици. Авторка проєкту и коавторка вистави Оливера Делич, а коавтор вистави Владимир Перич.
Орґанизатор културно-уметнїцкей часци програми на отвераню Владимир Балащак, виставу отвори заменїк городоначалнїка Сримскей Митровици Томислав Янкович, а на отвераню буду присуствовац и заменїк предсидателя Националного совиту (НС) Руснацох Йовґен Мудри и предсидатель Вивершного одбору НС Желько Ковач.
У рамикох вистави будзе и промоция кнїжки „Народне облєчиво бачванско-сримских Руснацох” Заводу за културу войводянских Руснацох (ВР). О кнїжки буду бешедовац директор Заводу за културу ВР Серґей Тамаш и музейна совитнїца Любица Отич.
Отверанє вистави и пригодна програма буду на 18 годзин у Малей сали Музею Сриму, Вука Караджича 3.