РУСКИ КЕРЕСТУР – Понеже Национални совит Руснацох, як снователь Руского народного театру (РНТ) „Петро Ризнич Дядя” всоботу з ребалансом свойого буджету опредзелєл 535 000 динари за наш национални театер, РНТ у тогорочней сезони пририхта ище єдну представу.
На вчера отриманей схадзки Управного одбору (УО) РНТ одлучене же, пре кратки час за пририхтованє, то будзе представа з меншим числом ґлумцох – „Як забиц предсидателя” Миру Ґаврана, у режиї Владимира Надя Ачима.
У представи буду ґлумиц штверо ґлумци – тройо з Вербасу и єдна ґлумица з Коцура, так же управним орґаном вербаского КПД „Карпати” РНТ предложи же би представа була витворена у копродукциї з вербаским Дружтвом, дзе РНТ будзе цалосни финансиєр представи.
Представа будзе витворена и на чесц Янкови Лендєрови з нагоди 60 рокох його живота и 40 рокох роботи у театру, а понеже того року Централна шветочносц означованя Националного швета Руснацох 17. януара будзе у Вербаше, будзе то и доприношенє националного театру означованю швета, бо премиєра новей представи планована 25. януара 2015. року у Вербаше.