РУСКИ КЕРЕСТУР – Праве на дзень кед у Руским Керестуре пред 70 роками почала робиц перша Ґимназия на руским язику, 25. фебруара 1945. року, вчера у Школи „Петро Кузмяк” означена тота рочнїца, як и 45-рочнїца отвераня другей Ґимназиї – 7. септембра 1970. року, перше як оддзелєня Ґимназиї у Вербаше.
О рочнїцох, як барз значних историйних подїйох за Руснацох на тих просторох, бешедовала професорка педаґоґиї Ирина Папуґа з Нового Саду, як виглєдовач тей тематики, автор кнїжки „Руска ґимназия”, алє и нєпоштредни учашнїк у отвераню Ґимназиї 1970. року.
Перши два годзини викладанє слухали школяре двох оддзелєньох осмей класи, а потим и школяре штирох класох руских оддзелєньох Ґимназиї, зоз своїма професорами.
Преподаванє почало з минуту цихосци за внєдзелю упокоєного Штефана Гудака, котри бул и школяр першей повойновей Ґимназиї. Папуґова бешедовала о обставинох у яких ше тедишнї руски предняци виборели за отверанє першей ґимназиї, хтора робела лєм три роки, а потим и другей хтора, з прерву, роби и нєшка.
Попри винєшених фактох, дзепоєдни значни хвильки и особи школяре могли видзиц на видео-биму през автентични фотоґрафиї, а як виявели, на велїх „осмакох” тото преподаванє уплївовало же би свойо дальше школованє предлужели праве у керестурскей Ґимназиї.
На концу вчерайшого стретнуца, Ирина Папуґова керестурскей Школи подаровала нашо значни виданя, а тром школяроком Ґимназиї – Марияни Колошняї, Кристини Малацко и Татяни Ґовля, подзекованя за реферати хтори написали и пречитали о о. Михайлови Мудрийови на єдней скорейшей програми керестурскей Секциї Дружтва за руски язик, литературу и културу.
