ДЕСПОТОВАЦ/РУСКИ КЕРЕСТУР – Млади каратисти рускокерестурского Русину освоєли аж дзевец медалї – шейсц у поєдинєчней и три у екипней конкуренциї – на цалодержавним змаганю, Купу Сербиї, хтори всоботу, 5. децембра отримани у Деспотовцу. Участвовали 30 клуби з коло 350 змагателями
Русин представяли дзевецеро члени Карате клубу и у катеґориї пионирох Ґлориян Штранґар освоєл друге, а Теодор Няради треце место.
У катеґориї „надїйох” Сара Планчак и Мартина Рац освоєли перше, Марина Надь треце место, а у катеґориї кадетох Александар Гарди треце место.
У катеґориї пионирох хлапцовска екипа Русину освоєла друге, а у катеґориї „надїйох” дзивчатска екипа Русину була перша. Хлапцовску екипу творели Ґлориян Штранґар, Теодор Няради и Андрей Дудаш, а дзивчатску Сара Планчак, Мартина Рац, Марина Надь и Анамария Няради.
Екипа кадетох, у хторей були Даниєл Кормош, Александар Гарди и Андрей Катона освоєла друге место, а шицки спомнути места керестурски каратисти на Купу Сербиї освоєли у борбох.
Остатнї освоєни, як и барз добри пласмани на шицких тогорочних змаганьох возвелїчую означованє 40 рокох присутносци каратеу у Керестуре и 35 роки роботи Карате клубу, гварел за Рутенпрес тренер каратистох Михал Орос.