ШИД – На вчерайшей конференциї за новинарох предсидатель Скупштини општини Шид и координатор општинског кол-центра Тихомир Стаменкович гварел же на подручу општини єст 184 особи позитивни на вирус корона.
Стаменкович додал же ше число позитивних звекшує пре нєодвичательних поєдинцох и ґрупох и же ше призначую случаї же ше похорели младши особи и дзеци, та и цали фамелиї.
Прето поволал гражданох на почитованє епидемиолоґийних мирох и на вакцинованє. Потераз вакциновани вкупно 6.360 особи, з хторих з першу дозу 4.018, а зоз другу 2.342 особи.
Окрем приявйованя прейґ еУправи, то годно покончиц и прейґ општинского кол-центра на телефон 022/711-001 и 064/87-5-012, а волонтере аж и одвожели нєрухомих до Дому здравя на вакцинованє.
Руководитель Оддзелєня за инспекцию Иґор Михайлович гварел же шицки инспекторе на терену и контролую почитованє розказаних мирох, алє єст и призначени случаї же особи хторим санитарна инспекция одредзела изолацию на 14 днї нє почитую у подполносци тоту миру.