КОЦУР – По доставаню потребних дозволох и опреми, тих дньох новозбудована каплїчка у Коцуре и урядово почала робиц. Шицки услуги коло хованя и хаснованя каплїчки од тераз у Коцуре будзе окончовац Явне комуналне подприємство „Комуналац” з Вербасу, а на основи одлуки Општини Вербас. По одлуки општинских орґанох, з отвераньом каплїчки покойни вецей нє годни лєжац дома, алє шицки хованя муша буц з каплїчки.
Услуга за хованя у Коцуре у „Комуналцу” кошта 7 тисячи 048,19 динари, а уключує приєм покойного до каплїчки, єй хаснованє, копанє и формованє гробу. Попри тим, подприємство понука и други услуги, як цо то предаванє квеца и венцох, вирабянє и розношенє посмертних оглашкох, ушорйованє и отримованє гробох на рочним уровню и друге.
Як за Рутенпрес виявел Любомир Милачич з „Комуналцу”, у їх подприємстве дежураю двацец штири годзини, а дежурни роботнїк котри роби у коцурскей каплїчки з Коцура, и може ю швидко одомкнуц.
Каплїчка у Коцуре збудована по истим проєкту як и у Руским Керестуре.