КОЦУР – На схадзки Совиту Месней заєднїци (МЗ) Коцур, штварток, 10. септембра, бешедоване и о роботи новей каплїчки на теметове, хтора на хаснованє придата 27. авґуста. На схадзки Совиту присуствовала и членїца Општинскей ради Вербас задлужена за координацию роботи з меснима заєднїцами, републичнима орґанами, орґанизациями, вирскима заєднїцами и здруженями гражданох у Општини Вербас Йована Вуйтович.
Найвецей бешедоване о компетенцийох над каплїчку понеже, як потолковала Вуйтовичова, по законских предписаньох услуги хованя може обезпечовац лєм даєдно явне комуналне подприємство, у тим случаю то вербаске ЯКП „Стандард”. Медзитим, тота одлука ище нє зажила, та прето каплїчка перше придата Месней заєднїци.
Порадзене же члени Совиту МЗ пойду на розгварку до „Стандарду” пре пренаходзенє найлєпшого ришеня о старосци на каплїчку, односно о єй хаснованю и отримованю, та же би Коцурци знали кому ше маю обрациц у случаю хованя.
На схадзки одлучене же ше каплїчку муши и опремиц, та комисия у составе проф. др Михайло Фейса, Мирко Штрбац и секретар МЗ Єлена Бесерминї вироби спецификацию опреми и прида ю до Општини, хтора будзе финансовац опреманє каплїчки.
На схадзки Совиту МЗ утвердзени и конєчни биланс заробеного пенєжу з предаваня кирбайских местох и одлучене же ше з того пенєжу пороби дацо за валал, о чим будзе одлучене на даєдней зоз шлїдуюцих схадзкох.
На достати вимоги за финансийну помоц од МЗ, одлучене же КПД „ДОК” достанє 25 000 динари за видаванє часопису „Ерато над Коцуром”, а МЗ да и одредзену финансийну помоц школяром коцурскей школи за ютрейшу роботну акцию на збераню шмеца на беґелю ДТД.
