ДЮРДЬОВ – Внєдзелю, 31. мая, у Велькей сали Дому Култури у Дюрдьове музично-фолклорни ансамбл Дому култури з Руского Керестура отримал цаловечарши концерт.
У мено Дюрдьовчанох и домашнїх з КУД „Тарас Шевченко” госцох, котри после вецей як дванац роки отримали концерт у Дюрдьове, привитал Мирон Сабадош, а директор Дому култури Йоаким Рац у привитним слове виражел наздаванє же такей павзи вецей нє будзе. Рац Дюрдьовчанох поволал и на Фестивал „Червена Ружа”, концом юния у Керестуре, а наявел и же у Дюрдьове под час „Ружи” будзе госцовац професийни ансамбл ПУЛС з Пряшова, зоз Словацкей.
Дом култури ше у Дюрдьове представел з вецей танєчнима ґрупами, хтори одтанцовали танци „Дружки на вешелю”, „Закарпатски Чардаш”, „Шеметковска полка”, „Строї ше черешень на белаво квитнуц”, „Вербунґ на Горнїци” и „Коломийка”.
У музичней часци наступели Хлопска и Дзивоцка шпивацка ґрупа, соло-шпиваче Янко Мудри и Мирослав Малацко, а провадзел их оркестер Дому култури.
По концерту госци и домашнї друженє предлужели у просторийох дюрдьовского Дружтва.
