НОВИ САД – Спомедзи 24-ох анґиосалох у Сербиї, у Войводини єст лєм два у Иституту у Сримскей Каменїци, цо спомалшує дияґностификованє хоротох. Покраїнска влада прето початком тижня чолнїком Управи за капитални укладаня Войводини поручела най планую средства за набавку опреми за три анґиосали, хтори буду поставени до общих шпитальох у Войводини.
Покраїнска влада сообщела же набавка опреми за нови анґиосали у Войводини допринєше швидшому поставяню дияґнозох и одвитуюцому стараню о пациєнтох з хоротами шерца, хтори єдни з найвекших причинох смертельносци у Войводини.
На истей схадзки прилапена и информация о обезпечованє пенєжу за валянє и скланянє остаткох будинку Радио-телевизиї Войводини на Мишелуку, та Управа за капитални укладаня достала задлуженє же би з ребаласом буджету обезпечела средства за финансованє тих роботох и їх фахового надпатрунку.
Утвердзени и Нарис декларациї „Моцна обновена реґионална политика за шицки реґиї после 2020. року” – документу хтори представя заєднїцке становиско европских реґийох о випатрунку и приоритетох финансованя зоз заєднїцких фондох ЕУ после 2020. року. Хаснователь тих фондох будзе и АП Войводина.