БЕОҐРАД – Орґанизация цивилного дружтва ЦРТА сообщела вчера же и вона почала провадзиц виберанкови процес на терену и же 30 припатраче збераю информациї о тим як ше окончує виберанкову кампаню.
Припатраче ЦРТИ провадза и як ше хаснує явни ресурси у кампанї, роботу виберанковей администрациї и явянє медийох, наводзи ше у сообщеню. Як ше додава, припатраче ЦРТИ, у рамикох припатрацкей мисиї „Гражданє на стражи”, под час виберанкового дня буду провадзиц квалитет виберанкового процесу на 450 виберацких местох.
– Црта, през свою инициятив „Истиномер”, будзе провадзиц цали виберанкови процес и то будзе перши раз же єдна домашня орґанизация провадзи комплетни виберанкови процес, период пред виберанковим дньом, виберанкови дзень и период по виберанковим дню – наводзи ше у сообщеню.
Циль анализовац применьованє законох и медзинародних стандардох под час пририхтованя и окончованя виберанкох, як и информовац гражданох о квалитету и демократичносци виберанкового процесу и случованьох под час кампанї, додава ше у сообщеню.