КОЦУР – Вчера закрита нова хижа фамелиї Чизмар з Коцура, хторей пред рок и пол згорело обисце и хтору ше будує з гуманитарну акцию. Остатнї роботи на хижи поробени дзекуюци донациї Ґорана Павича з Австриї.
Пред тим положени нови облаки и дзвери, виляти плочи у просторийох, а як гварела, иницияторка тей гуманей акциї Мария Горняк, надалєй потребне покласц електро и водоводни инсталациї, а потим хижу опремиц з мебльом.
– Од початку акциї, хтора тирва дацо менєй як рок, нє знала сом як, алє сом знала же троїм Чизмаровим дзецом врациме закрице над главу и то нам ше поспишело – гварела Горнякова и подзековала шицким котри допринєсли же би на месце погоренїска нєшка була нова хижа. Тиж поволала заинтересованих и за дальшу помоц и донациї, покля ше Чизмарово нє уселя до хижи.