На окраїску Шида бул дочасови простор за змесцованє псох блукачох. Пре нєвиполньованє стандардох є заварти, а пси ше и далєй шлєбодно шпацираю по улїци и з часу на час кусаю преходнїкох. Гражданє судзели општину, хтора плацела чкоду алє було и злохаснованя, односно фалшиви „кусаня”. У планє правиц нови сучасни простор за змесценє псох блукачох.
Проблем псох блукачох у Шидзе ище нє ришени тирвацо, гоч пред даскельома роками на окраїску городу бул збудовани дочасови простор за змесцованє псох хтори екипа ЯКП „Стандард” лапала по улїцох и змесцовала на спомнуту локацию. Тот простор бул лєм дочасове ришенє, бо пси блукаче у главних улїцох од центра ґу Дому здравя у єдним периодзе покусали и даскелїх гражданох хтори потим тужели локалну самоуправу.
По податкох Милана Филиповича, општинского правобранїтеля у 2013. року зоз општинскей каси як очкодованє покусаним гражданом виплацене аж 4,5 милиони динари, у 2014. року то було 1,5 милиони, а прешлого 2015. року коло милион динари.
У локалней самоуправи обачели же було и нєсовисних гражданох хтори сцели спреведнуц општину, та сцели приказац як же их покусал пес без власнїка на улїци. Прето формована Фахова комисия до хторей меновали ветеринара, правнїка и дохтора-гирурґа, так же кажде кусанє пса перше приходзи пред комисию.
– На тот способ зме сцели же би фаховци перше препатрели документацию и докази хтори граждан понукнє и спрам тей оцени гражданови понукаю пенєжне надополнєнє. З початку тоти надополнєня були 120 000 динари, рахуюци и судски трошки, медзитим, кед зме формовали комисию, надополнєня зменшани, так же єден час були 70 000, а тераз су 40 000 динари. Кед же ше покусана особа зложи з понукнуцом, вец ше нє порушує судски поступок и пенєж ше скорей виплаци без додатних трошкох суду – гвари Милан Филипович, општински правобранїтель.
Наш собешеднїк додава и же ше комисия зиходзи кажди два мешаци, односно кед ше назбера предмети хтори розпатра. Як докази ше хаснує фотоґрафиї покусаного цела и записнїки полициї. Кед же ше и после понукнуца комисиї особа нє зложи зоз понукнутим надополнєньом, вец особа сам порушує судски поступок, а правобранитель у тим случаю заступа локалну самоуправу.
Першобутне дочасове место за змесцованє псох блукачох нє виполньовало стандарди за змесценє псох и прето ше вец нє хасновало. У ЯКП „Стандард” планую збудовац нове место за псох и як сообщене за проєктну документацию потребне 490 000 динари, а за вибудов ище милион динари.
