РУСКИ КЕРЕСТУР – Жатва у керестурским хотаре у полним розмаху, а дотерашнї урожаї указую же жито того року добре плаци, понеже штреднї урожай виноши векшином коло 40 метери по гольту.
Єст и менши урожаї, з коло 30 метери гольту, алє вельо менєй и звичайно то на слабших жемох, док одкупйоваче гваря же єст надосц парастох котри натлачели и 50, та и прейґ 50 метери по гольту.
Жито доброго квалитету, з гектолитерску чежину од 76 до 84 ґрами, а пре горучави, з каждим дньом жатви зарно и сухше, та вчера влага зарна була 10-11 одсто.
Жито у Керестуре одкупюю подприємства „Юарбис”, „Аґрохома” и кулска „Житобачка” и виплацую го авансно, а вчера то було по 16 динари за килограм, з ПДВ. Як гваря, авансну цену ше будзе одредзовац так повесц кажди дзень, у зависносци од тарґовища, а нагадую же конєчна цена будзе коло 17 динари, цо вироятно будзе познате по законченю жатви у цалей держави.