НОВИ САД – Винчуюци Вельку ноц, предсидатель Скупштини Автономней покраїни Войводини Иштван Пастор пожадали же би шицки тото найвекше християнске швето препровадзели радосни, спокойни у и мире, зоз своїма найблїзшима.
Предсидатель Покраїнскей влади Боян Пайтич повинчовал наиходзаце швето шицким вирнїком, священству церквох и вирских заєднїцох и пожадал же би го дочекали у радосци и мире.
Вельку ноц шицким котри ю славя по юлиянским календаре винчує и подпредсидатель Покраїнскей влади и секретар за образованє, предписаня, управу и национални меншини-заєднїци Михаль Нїлаш.
– Найвекше християнске швето представя славенє побиди живота над шмерцу, хтора нам дава моц и виру же бизме витирвали на Христовей драги любови и правди – поручел Нїлаш у винчованки.