РУСКИ КЕРЕСТУР – Основна школа „Петро Кузмяк” достала 246 640 динари за набавку билих маґнетних таблох на конкурсу Покраїнского секретарияту за образованє, предписаня, управу и национални меншини-заєднїци. Средства достали и скоро шицки основни и штреднї школи з кулскей општини.
Як Рутенпрес дознава од директорки керестурскей Школи Хелени Пашо Павлович, буду набавени 12 били маґнетни табли до шицких учальньох дзе ходза школяре основней школи. Вєшенї таки табли обезпечени за штредню школу, та з нїма буду опремени шицки учальнї.
Сучасни били маґнетни табли, по хторих ше пише з фломастером, маю здравствени, гиґиєнски предносци, а оможлївюю и роботу по сучасних наставних методох.
По законскей процедури и явних набавкох, 12 нови били табли буду обезпечени по початок идуцого школского рока.