КОЦУР – З нагоди школскей слави, Дня св. Сави, у Дому култури у Коцуре вчера дополадня отримана програма хтору пририхтали школяре од пиятей по осму класу з наставнїцами Бояну Петрович и Ясминку Олич Илчешин, як и КУД „Завичайне врело”.
Програма отворена з гимну святого Сави, хтору виведол школски хор, а з пригодну бешеду швето повинчовала директорка Школи Славица Байор. У програми школяре шпивали, рецитовали и бешедовали о св. Савови.
Школску програму провадзела и помоцнїца предсидателя Општини Вербас Ксения Бенце, а по програми православни коцурски парох о. Здравко Бойович у Школи пошвецал и ламал славски колач.
