ДЕВА (РУМУНИЯ) – На другим планарним зашеданю, всоботу, 20. юния, делеґати з орґанизацийох-членїцох Тринастого Шветового конґресу Русинох/Руснацох/Лемкох (ШК РРЛ) вибрали нову Шветову раду (ШР РРЛ). Рада на конститутивней схадзки за предсидателя вибрала Штефана Лявинца з Мадярскей, а за подпредсидательох Мию Шайтоша з Горватскей и Юлиюса Фирцака з Румуниї- пише портал лем.фм.
Попри спомнутих, до ШР РРЛ на Конґресу, хтори од 18. по 20. юний тирвал у Деви, у Румуниї, вибрани Милан Мнягоньчак зоз Словацкей, Юлиюс Фирцак з Румуниї, Дюра Папуґа зоз Сербиї, Андрий Копча з Польскей, Микола Бобинец з України, Джон Риґети зоз ЗАД (як представитель Русинох ЗАД и Канади), Александар Мошкола з Ческей и Светлана Петрачи з Румуниї.
Дзень пред тим, у Деви отримани и Седми Шветови форум русинскей младежи, на хторим за предсидательку Форуму вибрана Светлана Петрачи.
Домашнї 14. ШК РРЛ будзе Горватска, одлучене на Конґресу у Деви, а на його шветочним отвераню, пияток, 19. юния, дотерашнї предсидатель ШР Дюра Папуґа Иванови Чижмарови, фолклористови зоз Свиднїку, зоз Словацкей, уручел Награду ШР „Василь Турок Гетеш”.
