РУСКИ КЕРЕСТУР – Всоботу, 18. априла, на Драмским мемориялє Петра Ризнича Дядї одбавена младежска представа „Врацим ше по вашо души“, у режиї Владимира Надя Ачима, а хтору виведли младиґлумци з Драмского студия „АРТ“ Дому култури Руски Керестур.
Горор-драма, хтора поробена по мотивох кнїжки Стивена Кинґа „Кери“ и филму Лоренса Дикоена, провадзи живот штредньошколки Кери Вайт (Адриана Надь), котру парняки нє прилапюю, а мац єй вирски фанатик и вшадзи видзи грих. Кери ма нєзвичайну моц телекинези – єй думки и чувства ше манифестую у физичним смислу.
Кед ю найпопуларнєйши леґинь у школи поволал на матурски вечар, Кери конєчно думала же є прилапена. Медзитим, того вечара є нємилосердно вишмеяна, та ше зоз своїма моцами вимсцела шицким котри ю на даяки способ повредзели.
Тема представи чежка, а ґлумци котри нє маю вельо искуства на сцени, нє могли нательо „ожиц“ приповедку кельо би требало. Представа „Врацим ше по вашо души“ у Керестуре виведзена уж трецираз, та було и менй патрачох.
Понеже млади тоту представу бавели вецей раз, участвовали з ню и на смотрох, обачиц же ґлумци „убавенши“ як на перших двох наступох у Керестуре. Награду жироя публики за найлєпше одбавену улогу у тей представи достала Адриана Надь.
Вецей фотоґрафиї з представи у окремней ґалериї на початним боку нашого сайту.