НОВИ САД – За початок другого школского полроча вишло и януарске число часопису за нашо дзеци „Заградка”. На рамикох фотоґрафиї з найвеселших децемберских подїйох – швета Миколая у Бикичу и Вербаше, манифестациї „Днї Миколи М. Кочиша” у Дюрдьове и дочеку Дїда Мраза у Новим Садзе.
Писнї и приповедки о жими, пахулькох, тащкох, цинкох и патулькох написали писателє Мелания Павлович, Михайло Ковач, Василь Мудри, Драґан Лукич и други. У рубрики „Облачок до швета” представени писатель Роберт Такарич и єдна його кнїжка за дзеци.
Цали єден бок януарскей „Заградки” пошвецени програмом у рамикох културней манифестациї „Днї Миколи М. Кочиша”, хтори отримани у Новим Орахове, Савиним Селу, Сримскей Митровици и у Дюрдьове.
И у тим чишлє часопис приноши школярски литературни и подобово роботи, инспировани зоз жимскима радосцами и домашнїма любимцами, а у „Заградки” и о тим як керестурски дзеци препровадзели жимски одпочивок на Данчовей долїни.
Жимски интересантносци зазначени и у рубрики „Вериш? Нє вериш?”, а читаче дознаю и за яки состави „Заградка” у тим полрочу будзе наградзовац сотруднїкох.