КУЛА – Тих дньох на сайту локалней самоуправи обявена прелиминарна ранґ лїстина апликантох за хаснованє змесценя у рамикох проєкта АктИС – Активни инклузивни сервис у Кули.
Зоз проєктом облапени 16 квартелї, 10 котри у явней власносци Општини Кула и 6 котри купени зоз средствох по проєкту. У тих квартельох по терашнєй структури ранґ лїстини буду змесцени особи на период од 3 роки, кельо би требала тирвац социялна адаптация.
Змесценє достали 22 особи у штирох катеґорийох – млади котри виходза зоз системи социялней защити и хранительских фамелийох, вкупно осмеро, потим особи зоз инвалидитетом и/лєбо з менталнима почежкосцами, тиж осмеро. У катеґориї жени жертви фамелийного насилства змесцени буду штверо, и двойо апликанти з катеґориї локалного худобного жительства.
Квартелї и обисца у тим проєкту даваю ше лєм на хаснованє, а условиє за пребуванє у нїх же би ше їх хаснователє притримовали плану котри индивидуално направени за каждого, о чим ше буду старац социялни роботнїки.