„20 днї у Мариуполю” у сали Културного центра Београда

208 Опатрене

БЕОҐРАД – Дзешата рочнїца русийскей инвазиї на Крим и Донбас и друга рочнїца од цалосней аґресиї на Україну будзе означена зоз гуманитарну проєкцию филма „20 днї у Мариуполю”, українского редителя, новинара Асошиєйтед преса (АП) и добитнїка Пулицеровей награди, Мстислава Чернова.

Документарни филм „20 днї у Мариуполю” номиновани за Оскара у катеґориї найлєпши документарни филм, а будзе приказани 21. фебруара, на 19 годзин у сали Културного центра Беоґрада (Коларцова 6).

Вкупни приход од предатих уходнїцох будзе прешлїдзени орґанизацийом хтори помагаю загроженим у войни у України. Проєкцию орґанизує Медзинародни фестивал документарного филма Beldocs у сотруднїцтве зоз амбасадами України и Зєдинєного Кральовства.

Уходнїци коштаю 400 динари и мож их купиц на блаґайни ДКЦ од 16 до 21 годзин.

На соботу, 24. фебруара, Амбасада України вєдно зоз представнїками других амбасадох и представнїцтвами медзинародних орґанизацийох, сербску явносцу, українску заєднїцу и другима заинтересованима гражданами планує участвовац у мирним „Маршу солидарносци зоз Україну” у Беоґрадзе.

Зоз Амбасади України у Сербиї сообщене же сход учашнїкох будзе на соботу 24. фебруара на 13 годзин у Пионирским парку у Беоґрадзе.

У сообщеню ше гвари же поволую най ше принєше сербски, українски и застави других жемох хтори помагаю України.

На 13:15 годзин ше руши о пешо зоз Пионирског парка на Площу Републики, дзе будзе мирни сход учашнїкох.

У сообщеню пише же сход хтори орґанизую Українски волонтере, потримує Амбасада України и дипломатски представнїцтва жемох партнерох и же є реґистровани у складзе з важацим законодавством Републики Сербиї.

ПОВЯЗАНИ ТЕКСТИ