РУСКИ КЕРЕСТУР – У рамикох Спортских бавискох младих (СИМ), всоботу 22. марца у спортскей гали у Руским Керестуре отримане Општинске змаганє у столним тенису.
На змаганю ше бавело у двох катеґорийох, у першей катеґориї бавели дзеци народзени 2010. року и младши док у другей катеґориї бавели дзеци народзени 2013. року и младши.
За СТК „Русин” у катеґориї 2010. рок и младши змагали ше: Теодор Гарвильчак, Стефан Арва, Тони Колошняї, Дарко Еделински и Стефан Ковачевич, док ше у катеґориї 2013. рок и младши змагала Николина Величкович.
У катеґориї 2010. рок и младши керестурски столнотенисере Теодор Гарвильчак завжал 1. место, док у катеґориї 2013. рок и младши Николина Величкович завжала 3. место.
У катеґориї 2013. рок и младши 1. место завжал Виктор Футо зоз екипи Гайдуку зоз Кули.
Теодор Гарвильчак и Виктор Футо зоз освоєнима першима местами пласовали ше на реґионалне змаганє.
Орґанизатор Општинского змаганя у столним тенису то „Плазма спортски бависка младих” у сотруднїцтве зоз СТК „Русин” и СТК „Гайдук” зоз Кули.
