РУСКИ КЕРЕСТУР – Внєдзелю вечар, 24. юлия, 29 школяре з наших местох и їх осмеро преподавателє и провадзаче, врацели ше з Попраду, зоз Словацкей, дзе други рок за шором отримана Лєтня школа руского язика у орґанизациї Одбору за образованє Националного совиту (НС) Руснацох.
Лєтня школя руского язика тирвала од 18. по 24. юлий, а школяре мали преподаваня з руского язика, историї, ґеоґрафиї, виронауки, спортски и музични активносци, и як за Рутенпрес гварел предсидатель Вивершного одбору НС Желько Ковач, котри тиж бул у Попрадзе, пребуванє прешло без почежкосцох, а планована програма и цилї Школи сполнєти.
На концу Лєтнєй школи, всоботу, 23. юлия, отримани и квиз о наученим, а под час пребуваня учашнїки мали и три екскурзиї – до Попраду, Старей Любовнї и туристичного места Штрске Плесо, на Татрох.
Шицки учашнїки на Лєтнєй школи од НВУ „Руске слово” на дарунок достали и по єдну нашу кнїжку.
