РУСКИ КЕРЕСТУР – На вчера вечар отриманей 10. схадзки седмеро присутни члени (од вкупно 11) Совиту Месней заєднїци Руски Керестур вигласали други штирирочни мандат потерашньому секретарови Михайлови Сабадошови.
По дньовим шоре Совит, хторому предшедавал предсидатель Владимир Олеяр, прилапел и вименки финансийного плану МЗ за тот рок, хтори настал пре нєдавни ребаланс општинского буджету пре ткв. „ципелкарох” у просвити и явней управи.
На схадзки констатоване и же акция збераня пенєжу за камион Добродзечному огньогасному дружтву чече удатно, а тирва по 10. май. Як визначел предсидатель Олеяр, потераз зоз рижних жридлох за тоту намену назберани у динарох милион 660 808 динари. Иншак пенєж даровали керестурски обисца, подприємства, а помогли и 25 здружени нашо фамелиї зоз Канади.
На схадзки прилапене и предкладанє о ценох терминох хаснованя Спортскей гали, хторе будзе послате до Општини Кула на конєчне одлучованє. По предкладаню, спортски клуби реґистровани у АПР-у, а члени су спортского союзу, галу би могли хасновац без надополнєня. Рекреативне хаснованє гали би коштало як и потераз, 3 500 динари мешачно, односно за єден термин 1 000 динари.
