РУСКИ КЕРЕСТУР – На трецей порядней схадзки Националного совиту (НС) Руснацох всоботу, 20. децембра у Руским Керестуре з явним гласаньом и векшину гласох вибрани члени штирох одборох НС, як и члени роботних целох и єдного пододбору, а пред вибором членох, НС гласал о числу одборох и роботних целох.
За предсидательку Одбору за образованє НС вибрана Мелания Римар з Петроварадину, а за членох представителє предшколских и основношколских установох, штреднєй школи и високого образованя, Заводу за видаванє учебнїкох, а новосц же Одбор за образованє у єдней особи будзе мац представителя студентох и за нєформалне образованє. До Одбору вибрани просвитни роботнїки Емилия Костич, Каролина Папуґа, Татяна Бучко Рац, Златка Малацко и Марина Гайдук з Руского Керестура, Серафина Яґлица и Весна Раґаї з Коцура, Марина Сабадош и Єлена Салаґ з Дюрдьова, Славица Мали и Славко Сабо з Вербасу, та Анамария Рамач Фурман з Нового Саду.
За предсидательку Одбору за културу НС вибрана Ґабриєла Саянкович з Руского Керестура, а за членох, по одредзених обласцох – Лидия, Пашо, Михайло Зазуляк, Сашо Палєнкаш и Йоаким Рац з Керестура, Амалия Варґа, Мария Тот, Любица Отич, Мирослав Кевежди и Мирослав Пап з Нового Саду, Йоаким Стрибер з Беоґраду, Микола М. Цап з Коцура, Деян Бобаль з Бикичу и Сандра Барань з Дюрдьова.
За предсидателя Одбору за културу на схадзки бул предложени и Миломир Шайтош, котри поцагнул кандидатуру, а за членох Саня Тиркайло зоз Шиду и подобови уметнїк Владимир Дорокхази з Нового Саду.
За предсидателя Одбору за информованє вибрани Иван Сабадош („Руске слово”), а за членох Златко Рамач, Анамария Ранкович (руски редакциї у РТВ Войводини), Еуфемия Ґшвенґ з Вербасу (локални медиї), Мария Стрибер з Керестура („Дзвони”), Мая Зазуляк з Керестура (”МАК” и интернет-инормованє) и Михал Рамач з Нового Саду, як особа за представянє Руснацох у медийох на сербским язику.
За предсидателя Одбору за службене хаснованє язика и писма вибрани Зоран Бережни зоз Сримскей Митровици, Славко Цупер зоз Шиду, Йоаким Грубеня з Нового Саду, Татяна Дудаш з Бачкей Тополї, Деян Загорянски з Вербасу и Владислав Салак з Керестура. За члена того одбору бул предложени и Боґдан Виславски з Нового Саду, алє нє достал векшинуз гласох, так же є нє вибрани до Одбору.
За предсидателя Роботного цела НС за науку вибрани др Янко Рамач з Кисачу, а за членох др Дюра Гарди и др Яков Кишюгас з Нового Саду, др Юлиян Тамаш з Вербасу и др Юлиян Рамач з Коцура. На схадзки бул предложени и др Михайло Фейса з Коцура, алє нє достал потребне число гласох.
За предсидателя Роботного цела за младих вибрани Сашо Сабадош зоз Зомбора, а за членох вибрани Яким Винаї и Сенка Надь з Керестура, Мелания Мали и Желько Фаркаш з Коцура, Мария Хромиш и Борис Цап з Дюрдьова, Иван Канюх и Соня Гудак з Нового Саду, Александра Лендєр и Геленка Папуґа з Вербасу и Далибор Болдиш зоз Шиду. На схадзки за членох того одбору були предложени и Борис Фейди з Коцура и Ирена Скубан з Вербасу.
На предкладанє Управного одбору Спортских бавискох „Яша Баков” за предсидателя Роботного цела за спорт вибрани Звонко Салаґ з Дюрдьова, а за членох Иван Папуґа з Вербасу, Юлиян Ковач зоз Шиду, Борис Шайтош з Керестура и Кирил Симунович зоз Суботици.
Роботне цело за управу и предписаня будзе меноване на шлїдуюцей схадзки, а за консултациї о його членох задлужени член НС Мирослав Кевежди.
Як порадзене на схадзки, число Пододбору за демоґрафию Одбору за службене хаснованє язика и писма нє огранїчене, а всоботу до Пододбору меновани Ксения Бесерминї з Коцура, Дария Медєши з Вербасу, о. Михайло Малацко з Керестура, Борислав Сакач з Нового Саду, о. Владимир Еделински Миколка з Беркасова и Мирослав Чакан з Дюрдьова. После одредзених консултацийох, Пододбор за демоґрафию будзе дополнєни з членми з наших местох.
За секретара НС всоботу менована Таня Арва Планчак, котра и секретарка технїчней служби НС Руснацох на стаємней роботи.
На схадзки вецей члени НС пригваряли же нє консултовани ношителє шицких седем лїстинох за предкладанє членох до Вивершного обору, одборох и роботних целох НС, на цо предсидатель НС Славко Рац одвитовал же шицки лїстини були поволани же би по соботову схадзку предкладали кандидатох за членох, алє то зробели лєм дзепоєдни лїстини.