КУЛА – У грекокатолїцкей парохиї св. Йосафата у Кули, вирни преславюю найрадоснейше швето Рождества Христового – Крачун, починаюци од Вилїї 6. януара през три днї по 9. януар.
Крачун преславени на богослуженьох у церкви у самей Кули, а тиж и у филиялней церкви у Крущичу, дзе вирни на тото швето приходза вецей як звичайно. Служби Божо служели домашнї священїки оцове Василиянє парох о. Дамян Кича ЧСВВ и о. Платон Салак ЧСВВ, а место казанї пречитали Крачунску винчованку нашого владики кир Георгия. На шицких Службох на перши дзень було и мированє вирних.
Швето возвеличанe и зоз колядованьом, та на перши дзень по Служби Божей Крачунски концерт отримало КУД „Иван Сенюк” и дзеци цо ходза на українски язик, а вчера на други дзень зоз колядами наступела Женска шпивацка ґрупа Дому култури Руски Керестур як и виронаучни дзеци.
